Netanyahu: Lufta me Hezbollahun nuk ka përfunduar, ky është hapi i radhës që do të ndërmarrim

Kryeministri izraelit Benjamin Netanyahu ka deklaruar se operacionet kundër Hezbollahut nuk kanë përfunduar ende, duke theksuar se objektivi final mbetet shpërbërja e plotë e këtij grupi militant në Liban.

Në një videomesazh të publikuar në ditën e parë të një armëpushimi 10-ditor, Netanyahu u shpreh se Izraeli ka arritur “rezultate të rëndësishme” në luftën e rifilluar më 2 mars kundër Hezbollahut, por paralajmëroi se rruga drejt përfundimit të këtij konflikti është ende e gjatë.

Sipas tij, dy kërcënime kryesore nga Libani janë neutralizuar, një tentativë për infiltrimin e mijëra militantëve në territorin izraelit dhe një arsenal prej rreth 150 mijë raketash të destinuara për të goditur qytetet e Izraelit. Ai shtoi se rreth 90% e këtyre kapaciteteve janë shkatërruar dhe se Hezbollah sot është “vetëm një hije” e fuqisë që kishte më parë.

Megjithatë, Netanyahu theksoi se Izraeli ka një tjetër objektiv strategjik, shpërbërjen e Hezbollahut, një proces që sipas tij kërkon kohë, durim dhe diplomaci të kujdesshme.

Deklaratat e tij vijnë në një moment kur presidenti amerikan Donald Trump ka bërë të ditur se ka ndaluar Izraelin nga sulme të mëtejshme në Liban, duke hapur rrugë për zgjidhje diplomatike. Trump shkroi se “Izraeli nuk do të bombardojë më Libanin”, duke e cilësuar situatën si të tejkaluar.

Netanyahu ka konfirmuar se ka pranuar propozimin për armëpushim, duke e konsideruar atë si një mundësi për një marrëveshje historike paqeje me Libanin. Ai theksoi gjithashtu se për herë të parë pas dekadash, përfaqësues të të dy vendeve po zhvillojnë bisedime direkte.

Ndërkohë, ministri i Mbrojtjes i Izraelit paralajmëroi se operacionet mund të rinisin dhe se civilët në jug të Libanit mund të përballen sërish me evakuime, ndërsa situata mbetet e tensionuar.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)