Alarm në Londër, policia britanike ngrihet në këmbë pas kërcënimit ndaj ambasadës së Izraelit

Forca të shumta të Policisë Metropolitane dhe njësive britanike të Antiterrorit kanë rrethuar zonën e Kensington Gardens, në të cilën ndodhet godina e ambasadës së Izraelit.

Dislokimi i forcave të shumta të policisë dhe rrethimi i zonës u bë pas gjetjes së sendeve të dyshimta dhe një videoje që qarkulloi online, e cila shfaqte dronë që targetonin ambasadën e Izraelit.

Efektivë policie me veshje mbrojtëse kundër substancave të rrezikshme janë vendosur në një nga parqet më prestigjioze të Londrës, vetëm pak metra larg ambasadave dhe rezidencave mbretërore, ndërsa po inspektojnë një numër sendesh të lëshuara nga dronët.

Policia Metropolitane thotë në një komunikatë për mediat se për momentin, ata nuk besojnë se ka një "rrezik në rritje për sigurinë publike", por njerëzve u kërkohet të shmangin zonën ndërsa hetimi vazhdon.

Foto: X

Një grup i lidhur me Iranin ka pretenduar në internet se kishte sulmuar ambasadën izraelite me një dron që përmbante substanca të rrezikshme dhe paralajmëroi publikun të shmangte zonën, por pretendimet për një sulm ndaj ambasadës janë mohuar si nga Policia Metropolitane ashtu edhe nga ambasada izraelite.

"Policia Kundër Terrorizmit në Londër është në dijeni të një videoje të shpërndarë në internet gjatë natës, në të cilën një grup pretendon se ka shënjestruar Ambasadën e Izraelit aty pranë me dronë që transportonin substanca të rrezikshme. Ndërsa mund të konfirmojmë se Ambasada nuk është sulmuar, po kryejmë hetime urgjente për të përcaktuar vërtetësinë e videos dhe për të identifikuar çdo lidhje të mundshme midis saj dhe sendeve të hedhura në Kopshtet e Kensingtonit”, tha një zëdhënës i Policisë Metropolitane.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)