Kompjuteri i NASA-s bën parashikimin e tmerrshëm: Ja kur mbaron jeta në Tokë

Një studim shkencor, i mbështetur nga simulime të avancuara kompjuterike të realizuara nga NASA, ka ngritur shqetësime mbi të ardhmen afatgjatë të jetës në Tokë.

Sipas të dhënave, një superkompjuter ka analizuar rreth 400 mijë skenarë për të parashikuar se kur planeti ynë mund të bëhet plotësisht i pabanueshëm.

Studimi, i titulluar “The future lifespan of Earth’s oxygenated atmosphere”, arrin në përfundimin se jeta në Tokë ka një afat të kufizuar, i lidhur drejtpërdrejt me evolucionin e Diellit.

Shkencëtarët shpjegojnë se, me kalimin e viteve, Dielli do të bëhet gjithnjë e më i nxehtë, duke rritur temperaturat në Tokë deri në nivele të papërballueshme.

Sipas simulimeve, rreth vitit 1,000,002,021, kushtet në planet do të jenë aq ekstreme sa as mikroorganizmat më rezistentë nuk do të mund të mbijetojnë. Në atë fazë, oqeanet pritet të kenë avulluar, atmosfera do të jetë holluar ndjeshëm dhe temperaturat do ta bëjnë jetën të pamundur.

Megjithatë, ekspertët theksojnë se njerëzimi nuk ka gjasa të arrijë deri në atë periudhë. Rritja e temperaturave, ulja e nivelit të oksigjenit dhe përkeqësimi i cilësisë së ajrit pritet të ndikojnë shumë më herët në mbijetesën e specieve.

Autori kryesor i studimit, Kazumi Ozaki, thekson se vlerësimet e mëparshme jepnin rreth dy miliardë vite jetë për biosferën e Tokës, por modelet e reja e përgjysmojnë këtë periudhë. Ai paralajmëron se, me kalimin e kohës, niveli i oksigjenit në atmosferë do të bjerë ndjeshëm, duke e bërë të pamundur jetën për organizmat që varen nga ai.

Ndërkohë, zhvillimet aktuale globale, përfshirë tensionet gjeopolitike dhe ndryshimet klimatike, shtojnë pasigurinë për të ardhmen e afërt të njerëzimit.

Shkencëtarët nuk përjashtojnë as skenarë të tjerë, si goditjet nga asteroidet apo katastrofa të tjera natyrore, që mund të ndikojnë në fatin e jetës në Tokë shumë më herët sesa parashikimet afatgjata.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)