“Rama hodhi në kosh kërkesën për arrestimin e Ballukut”, Berisha: Pensionistët mezi blejnë 2kg domate

Akuzat e forta të Sali Berishës ndaj kryeministrit Edi Rama vijuan gjatë mbledhjes me Kolegjin e Kryetarëve. Kreu i Partisë Demokratike deklaroi se ai ka refuzuar të veprojë ndaj ish-zv.kryeministres Belinda Balluku, pasi sipas tij, hetimet do të çonin drejt kryeministrit. Berisha theksoi se opozita duhet të qëndrojë e vëmendshme dhe aktive në çdo moment.

“Pas dokumentimit të implikimit të tij direkt në një mori aferash korruptive, në dosjen Balluku dhe jo vetëm, pas dokumentimit se AKSHI është kopshti privat dhe gropa e zezë e Lindave të Ramës dhe vetë atij, vendosi në një akt të pashembullt t’i mbyllë dyert drejtësisë. Të hedhë në kosh kërkesën për arrestimin e Lubi Ballukut duke qenë i bindur se do të ishte direkt radha e tij. Kjo sepse dosja ‘Balluku’, mbi 60% ishte vetë dosja ‘Rama’”, tha Berisha.

Ai deklaroi se situata politike dhe ekonomike në Shqipëri është drejt përkeqësimit dhe se vendi ndodhet në një “udhëkryq gjithnjë e më të rrezikshëm”, për shkak të qeverisjes aktuale. “Uji fle, hasmi nuk fle. Ne duhet të themi: uji fle, opozita nuk fle. Po fjeti, e merr lumi”, u shpreh kryetari i PD-së.

Foto: Facebook/Sali Berisha

Akuzat vijuan edhe rreth qeverisjes së tij me korrupsionin dhe keqmenaxhimin ekonomik. Berisha kritikoi deklaratat e Ramës mbi rritjen ekonomike, duke pretenduar se treguesit makroekonomikë nuk pasqyrojnë realitetin e qytetarëve. Sipas tij, shqiptarët po përballen me varfëri të thelluar, ndërsa përfitimet nga fondet publike shkojnë tek një grup i vogël personash të lidhur me qeverinë.

“Rama thotë s’ka korrupsion se u rrit GDP, por pensionistët mezi blejnë dy kile domate,” u shpreh Berisha. “Gjendja e shqiptarëve përkeqësohet nga muaji në muaj, mashtrues ordiner i paskrupullt, kalon nga celulat e partisë së krimit, nga organizata te tjetra, absolutisht me një zinxhir të pafund mashtrimesh. Shet mashtrime dhe injorancë, ndërkohë që rreziku për varfërinë po prek gati gjysmën e popullatës. Këto ditë u thotë shqiptarëve se nuk ka mundësi të ketë korrupsion. Po, po rritet GDP-ja, por kunatolli i Lindës së Surrelit nga kjo rritje merr 75 milionë dollarë pa bërë asgjë, për inteligjencën artificiale. Kurse ti o pensionist, nga kjo rritje merr 8 euro. Kjo është rritja”, shtoi ai.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)