“Çdo janar do të ketë rritje pensionesh”, Rama: Pesëfishim deri në vitin 2030

Kryeministri Edi Rama zhvilloi një takim me pensionistët e njësisë administrative nr. 2 në Tiranë, ku prezantoi skemën e re të rritjes së pensioneve dhe ndryshimet që pritet të zbatohen në vitet e ardhshme. Ai theksoi se deri më tani është aplikuar vetëm indeksimi, të cilin e dalloi nga rritja reale e pensioneve.

“E vetmja gjë që kemi bërë për vite të tëra ka qenë indeksimi i pensioneve, por që nuk është rritje në kuptimin e vërtetë të fjalës”, u shpreh Rama, duke shtuar se ndryshimi real ka nisur tashmë. “Kur ekonomia na krijoi kushte, ju nga janari ju është rritur pensioni. Për çdo janar, do të ketë rritje”.

Kryeministri deklaroi se kjo politikë do të vijojë në mënyrë progresive edhe në vitet në vijim, duke parashikuar rritje më të mëdha çdo vit. “Për janarin e vitit që vjen do të ketë rritje të kësaj rritje. Në 2029 do të kemi katërfishim dhe në 2030 pesëfishim”, tha ai, duke e lidhur këtë me përmirësimin e performancës ekonomike.

Rama u ndal edhe te situata ekonomike dhe faktorët e jashtëm që, sipas tij, kanë ndikuar në vend. “Gjëra që ndodhin jashtë vullnetit tonë, nuk i vendosim ne por duhet të përballemi, nga pandemia, tërmeti, lufta në Ukrainë e tani lufta në Lindjen e Mesme”, deklaroi Kryeministri, duke përmendur edhe ndikimin në çmimet e energjisë dhe ushqimeve.

Foto: Edi Rama/Facebook

Ai shtoi se prioritet i qeverisë mbeten pensionistët dhe familjet në nevojë, për të cilat po përgatitet një skemë e re mbështetëse. “Gjëja e parë që do mendojmë jeni ju, të tjerët vijnë pas”, u shpreh Rama, duke theksuar se po punohet për një sistem të ri ndihme. Në këtë kuadër, Kryeministri foli edhe për një instrument të ri mbështetjeje për shtresat në nevojë. “Do të japim karta për artikujt bazë, jo për pijetore”, tha Rama, duke sqaruar se ndihma do të fokusohet te shporta e konsumit bazë.

Kryeministri theksoi edhe nevojën për ndryshime në skemën ekzistuese të pensioneve për kategori të caktuara. “Do të rishikojmë skemën aktuale për pensionistët e vetëpunësuar dhe për ata që vazhdojnë të punojnë”, tha Rama, duke nënvizuar se qëllimi është përmirësimi i trajtimit për të gjitha kategoritë e pensionistëve. Rama gjithashtu përmendi rritjen e numrit të turistëve dhe investimeve të huaja, si tregues të rritjes ekonomike. “Sot jemi në 12 milionë turistë vizitorë me pasaporta të huaja, nga 2 milionë që e morëm në fillim. Kemi pasur 300-400 milionë euro investime të huaja, sot jemi në mbi 1.5 miliardë”, u shpreh ai.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)