Alarmi i New York Times: Irani ka humbur vetëm 30% të raketave balistike

Irani ka humbur vetëm rreth 30% të arsenalit të tij raketor gjatë luftës me Shtetet e Bashkuara dhe Izraelin. Madje, Teherani po punon për rikuperimin e armëve të mbetura, raportojnë burime të inteligjencës amerikane për New York Times.

Sipas vlerësimeve të inteligjencës amerikane, Teherani ka ende në dispozicion rreth 70% të rezervave të raketave balistike që kishte para konfliktit, si dhe rreth 60% të lëshuesve të raketave. Po ashtu, Irani thuhet se ruan ende rreth 40% të arsenalit të dronëve.

Raporti thekson se gjatë armëpushimit dyjavor mes Iranit dhe SHBA-së, i cili hyri në fuqi më 8 prill, Irani ka nisur të nxjerrë nga depot nëntokësore raketa dhe lëshues raketash. Në atë periudhë, Teherani kishte në përdorim vetëm gjysmën e lëshuesve të raketave balistike, por më pas ka arritur të rikuperojë edhe 100 lëshues të tjerë, duke e çuar kapacitetin në rreth 60% të nivelit para luftës.

Sipas NYT, Irani po përpiqet gjithashtu të nxjerrë rezervat e raketave që mund të kenë mbetur të varrosura nën rrënoja pas sulmeve amerikane dhe izraelite. Pasi ky proces të përfundojë, inteligjenca amerikane vlerëson se Irani mund të arrijë të rikthejë deri në 70% të arsenalit të tij raketor në krahasim me periudhën para konfliktit.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)