Portugalia, vendi i radhës që ndalon rrjetet sociale për fëmijët

Parlamenti i Portugalisë ka miratuar një projektligj që vendos kufizime të reja për përdorimin e mediave sociale nga fëmijët dhe adoleshentët.

Sipas rregullave, fëmijët nën 13 vjeç nuk do të kenë më qasje në platformat sociale, ndërsa të rinjtë nga 13 deri në 16 vjeç do të mund të përdorin këto platforma vetëm me miratimin e prindërve, i cili do të jepet përmes një sistemi publik të quajtur Çelësi Celular Dixhital.

Autorët e projektligjit nga Partia Social Demokrate shpjegojnë se masa synon të mbrojë fëmijët nga ngacmimi kibernetik, përmbajtja e dëmshme dhe individë me rrezik. Ky është një nga hapat e parë ligjorë në Europë që vendos kufizime konkrete për përdorimin e mediave sociale nga të miturit.

Projektligji do të diskutohet më tej në një komision të posaçëm dhe duhet të kalojë për miratim përfundimtar në parlament përpara se të bëhet ligj zyrtar.

Në të thuhet gjithashtu se kompanitë e teknologjisë që nuk respektojnë këto kufizime mund të përballen me gjoba deri në 2% të të ardhurave të tyre globale.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)