Konferenca e Mynihut, Friedrich Merz: Rendi botëror që njihnim nuk ekziston më, duhet një Evropë sovrane

Kancelari gjerman Friedrich Merz çeli punimet e Konferencës së Sigurisë në Mynih me një mesazh të fortë mbi transformimin e rendit ndërkombëtar, duke deklaruar se bota nuk ndodhet në shpërbërje, por rendi që njihej pas luftës, nuk ekziston më.

Në fjalën e tij, kancelari gjerman theksoi se Evropa po del nga ajo që ai e quajti “pushim i gjatë nga historia botërore”, duke hyrë në një fazë të re konfrontimesh gjeopolitike, rivalitetesh mes fuqive të mëdha dhe konfliktesh të hapura. Sipas tij, rikthimi i politikës së forcës dhe balancave strategjike kërkon një përgjigje më të vendosur nga vendet evropiane.

Merz nënvizoi se prioriteti kryesor është pranimi i këtij realiteti të ri, pa e konsideruar atë si të pashmangshëm. Ai bëri thirrje për rritje të shpenzimeve të mbrojtjes, forcim të kapaciteteve parandaluese dhe një qasje më të bashkërenduar në politikën e jashtme dhe të sigurisë.

Duke krahasuar peshën ekonomike globale, ai theksoi se ekonomia e Bashkimit Evropian është shumëfish më e madhe se ajo e Rusisë, por kjo epërsi nuk reflektohet në ndikim të barabartë strategjik.

Sa i përket luftës në Ukrainë, Merz deklaroi se Moska nuk po demonstron vullnet për negociata serioze paqeje dhe se përfundimi i konfliktit varet nga dobësimi ushtarak dhe ekonomik i Rusisë.

Ai konfirmoi gjithashtu diskutimet me Emmanuel Macron mbi mundësinë e forcimit të parandalimit bërthamor evropian si pjesë e arkitekturës së re të sigurisë.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)