“Qeveri e korruptuar dhe arrogante”, mijëra qytetarë protestojnë në Bullgari

Mijëra qytetarë në Bullgari kanë protestuar në Sofje dhe në disa qytete të tjera të vendit kundër qeverisë në dorëheqje, duke kërkuar zgjedhje të ndershme dhe reformë në sistemin e drejtësisë për të frenuar atë që e përshkruajnë si “korrupsion endemik në shtetin më të varfër të Bashkimit Europian”.

Protestat u zhvilluan në prag të planifikimit për futjen e euros më 1 janar. Sipas agjencisë Reuters, demonstruesit mbajtën flamujt e Bullgarisë dhe të Bashkimit Evropian.

“Sido që ta shohësh, gjithçka që lidhet me këtë qeveri është jashtëzakonisht e paturpshme. Pa asnjë ndjenjë turpi. Një sjellje kaq arrogante e përkufizon këtë qeveri,” deklaroi një nga protestuesit, Shisman Nikolov.

Ndërsa studentja Kalina Jurukova u shpreh: “Nëse vjedh vazhdimisht, duhet të mendosh se je mbi të gjithë. Njerëzit arrogantë dhe pa asnjë ndjenjë turpi nuk e meritojnë respektin tim.”

Më herët gjatë këtij muaji, qeveria tërhoqi projektbuxhetin për vitin 2026, i pari i hartuar në euro, pas protestave masive. Qeveria në dorëheqje duhej të mbikëqyrte kalimin nga leva bullgare në euro, por kryeministri, Rosen Zheljazkov, dha dorëheqjen javën e kaluar pas disa javësh protestash kundër korrupsionit dhe një buxheti të ri që parashikonte rritje taksash.

Partitë opozitare dhe organizata të tjera kanë kundërshtuar veçanërisht rritjen e planifikuar të kontributeve për sigurimet shoqërore dhe taksës mbi dividentët, të cilat synonin financimin e shpenzimeve më të larta shtetërore.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)