“Dimri po zhduket si stinë!” Ekspertët ngrenë alarmin: Temperatura rekord në Arktik

Ekspertët e klimës  paralajmërojnë për situatë alarmante në Arktik, ku gjatë vitit të fundit janë regjistruar temperatura rekord, duke rrezikuar që dimri të “fshihet” si stinë. Sipas Agjencisë Amerikane për Oqeane, Atmosferë dhe Klimë, Arktiku po ngrohet katër herë më shpejt se mesatarja globale, një fenomen që shkaktohet kryesisht nga djegia e karburanteve fosile.

Të dhënat tregojnë se nga tetori 2024 deri në shtator 2025, temperaturat në të gjithë rajonin arktik arritën nivelet më të larta në 125 vitet e fundit, ndërsa 10 vitet e fundit rezultojnë si më të ngrohtat e regjistruara ndonjëherë. Kjo ngrohje ka sjellë tkurrje të dukshme të akullnajave, me sipërfaqen maksimale të akullit në vitin 2025 më të vogël se çdo vit tjetër në 47 vitet e monitorimit satelitor.

Shkencëtarët paralajmërojnë gjithashtu se vitin e kaluar, Arktiku ka përjetuar sasi rekord reshjesh, por shumica e tyre nuk ka rënë si borë. Sasia e borës në qershor është sa gjysma e asaj para 6 dekadash, duke treguar një ndikim të fortë të ndryshimeve klimatike në ekosistemet e veriut.

Ekspertët theksojnë se Arktiku, i njohur për rolin e tij si rregullator kryesor i klimës globale, po ndikohet në mënyrë dramatike nga ngrohja globale.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)