Nju Jorku ngrin nga i ftohti, regjistrohen të paktën 18 viktima

Të paktën 18 persona kanë humbur jetën si pasojë e një vale të zgjatur moti ekstremisht të ftohtë që ka përfshirë New York City, ka bërë të ditur kryebashkiaku i qytetit, Zohran Mamdani. Sipas tij, viktima e fundit u regjistrua gjatë fundjavës, kur një person humbi jetën në rrugët e qytetit.

Që nga fundi i muajit janar, New Yorku ka përjetuar një nga periudhat më të gjata të temperaturave nën zero në gjashtë dekadat e fundit, me gjithsej 13 ditë radhazi ku temperaturat kanë qenë 0°C ose më poshtë. Mamdani theksoi se “çdo jetë e humbur është një tragjedi”, duke shtuar se autoritetet po vazhdojnë të mbështesin familjet e prekura.

Përballë kushteve të rënda, qyteti shpalli emergjencën e ashtuquajtur “Kodi Blu” më 19 janar, duke lehtësuar procedurat për pranimin në strehimoret për personat e pastrehë.

Sipas kryebashkiakut, rreth 1,400 persona janë strehuar që nga ajo kohë, ndërsa kapacitetit ekzistues i janë shtuar edhe 64 dhoma hoteli. Po ashtu, mbi 150 punonjës shtesë janë angazhuar në terren për të ndihmuar qytetarët në nevojë.

Autoritetet konfirmuan se të paktën 10 nga viktimat u gjetën jashtë, ndërsa rrethanat e vdekjeve të tjera mbeten ende të paqarta. Shërbimi Kombëtar i Motit parashikon një rritje të lehtë të temperaturave gjatë javës, por ato do të mbeten ende nën mesataren sezonale.

Agjencitë e emergjencës paralajmëruan gjithashtu për rreziqe shtesë, si rënia e akullit nga ndërtesat dhe ngrirja e rrugëve gjatë natës, duke u bërë thirrje qytetarëve të tregojnë kujdes maksimal.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)