Çmenduria me dopingun, injeksione me acid në organet gjenitale për të fluturuar më lart

Çmenduria për të arritur rezultate të larta sportive, duke përdorur edhe dopingun arrin të nivele gati të paimagjinueshme. Kjo është edhe çështja kryesore në Olimpiadën Dimërore “Milano-Cortina 2026”, duke nxitur diskutimet për një skandal të pazakontë.

Disa sportistë dyshohet se kanë përdorur metoda ekstreme për të përfituar avantazh aerodinamik, përfshirë edhe injeksione me acid hialuronik në zonën gjenitale. Qëllimi është zgjerimi i tutave sportive në pjesën e ijëve. Në të kaluarën, në sportin e kërcimit me ski, shumë atletë janë ndëshkuar për manipulimin e tutave, të cilat sot kontrollohen me skanera 3D dhe mikroçipa.

Materiali i tepërt dhe jo i qepur pas trupit, veçanërisht në zonën intime, mund të krijojë efekt “velë” dhe të ndikojë që fluturimi nga pedana të zgjasë deri në 5-6 metra më tepër. Për këtë arsye, pas Kampionatit Botëror të vitit të kaluar, disa kërcyes norvegjezë u pezulluan për ndryshime të paligjshme në qepjet e kostumeve.

Një studim shkencor ka treguar se rritja e perimetrit të tutave ul rezistencën aerodinamike dhe rrit forcën ngritëse. Sipas zërave të fundit, disa ekipe po përpiqen ta anashkalojnë sistemin e kontrollit duke “justifikuar” kostumet më të gjera përmes ndryshimeve trupore artificiale. Pikërisht siç janë injeksionet me acid për zmadhimin e organit gjenital. Alternativa të tjera të përmendura janë përdorimi i materialeve shtesë në të brendshme ose i aksesorëve prej silikoni.

Foto nga web

Presidenti i Agjencisë Botërore Anti-Doping, Witold Banka ka deklaruar se çështja do të shqyrtohet me kujdes. Edhe pse aktualisht nuk ka prova konkrete që sportistë të kenë përdorur këtë metodë të pazakontë, federatat dhe WADA kanë ngritur nivelin e vëzhgimit për të parandaluar çdo tentativë për mashtrim.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)