Tension në “Australian Open”, Zverev acarohet me Alcaraz që kërkoi mjekun në fushë

Carlos Alcaraz siguroi një vend në finalen e “Australian Open” pas një dueli maratonë kundër Alexander Zverev, që zgjati më tepër se pesë orë. Ndeshja e luftuar u karakterizua edhe nga momentet e tensionit, veçanërisht gjatë setit të tretë. Teksa po kryesonte 5-4 dhe ishte dukshëm i lodhur, Alcaraz bëri shenjë për pushim.

Spanjolli kërkoi hyrjen e mjekut në fushë, për të trajtuar ngërçin në këmbën e djathtë. Kërkesa e tij shkaktoi zemërim te Zverev, i cili e konsideroi ndërprerjen të papërshtatshme: “Ka ngërç, çfarë është kjo? Nuk mund të kërkojë pushim për ngërç. Kjo është e papranueshme”, iu ankua ai gjyqtarit të stolit.

Alcaraz mori trajtim nga fizioterapisti, megjithatë nuk është qartë nëse problemi ishte realisht ngërçi. Në fakt, rregullat e turneut nuk parashikojnë ndërprerje të tilla dhe ky fakt e shtoi acarimin e Zverev. Gjermani solli në vëmendje gjithashtu akuzat e mëparshme për favorizime ndaj Alcaraz dhe italianit Jannik Sinner, duke thënë se organizatorët i mbrojnë të dy: “I mbani të dy të sigurt, është e pabesueshme. Nuk mund ta besojmë këtë”.

Pavarësisht asaj që ndodhi, Zverev arriti ta fitonte setin e tretë, por më pas u dorëzua në setin e pestë të sfidës. Pas përfundimit të ndeshjes, tensionet u zhdukën dhe të dy tenistët shkëmbyen një përqafim të ngrohtë, duke treguar respektin reciprok.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)