Skandal me shpërblimet, Këshilli i Ministrave “sakaton” peshëngritjen

Shpërblimet për sportistët elitarë, për arritje të larta në arenën ndërkombëtare, ishte një prej ligjeve që ndryshoi fytyrën e sportit në Shqipëri. Prej përcaktimit të bonuseve financiare, vendi ynë siguroi medaljet e para olimpike me mundjen, por edhe tituj botërorë dhe europianë edhe në disiplina të tjera si peshëngritje, atletikë apo gjimnastikë.

Megjithatë, në Botimin e Fletores Zyrtare, të botuar së fundmi me ndryshime më 30 dhjetor 2025, është regjistruar një skandal që rrezikon të shkatërrojë punën e mirë, të bërë deri më tani. Më e prekura nga të gjitha është peshëngritja.

Bazuar “në kriteret për mënyrën e shpërblimit dhe trajtimit të sportistëve që përfitojnë statusin e nivelit të lartë”, në pikën 4/1 përcaktohet se: “Sportisti shpërblehet financiarisht vetëm për një rezultat sportiv të arritur në veprimtaritë ndërkombëtare zyrtare si Kampionat Botëror, Europian e Ballkanik”.

Foto: Federata e Peshëngritjes

Pikërisht aty erdhi edhe goditja për peshëngritjen, ku përcaktohet se “sportisti i klasifikuar në dygarësh shpërblehet vetëm për rezultatin përfundimtar në masën 100%”. Kjo do të bënte që titujt kampionë bote apo europe në stile të veçanta si shkëputje dhe shtytje të mos vlerësohen.

Goditja nga VKM-ja e ndryshuar erdhi si një goditje specifikisht për peshëngritjen, sport që vetëm në vitin 2025 i solli Shqipërisë 60 medalje ndërkombëtare. Për ta bërë edhe më absurd ndryshimin e paparalajmëruar në shpërblimet për sportin, dokumenti mban emrin e ish-zv.kryeministrit Arben Ahmetaj, i cili prej korrikut 2023 është në arrati, pasi kërkohet nga drejtësia për “shpërdorim detyre”  në lidhje me inceneratorët e Fierit dhe Elbasanit.

Foto: Federata e Peshëngritjes

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)