Real dhe PSG prenotojnë çerekfinalet, vazhdon përralla Bodo/Glimt

Real Madridi hodhi një hap të madh drejt çerekfinaleve të Ligës së Kampionëve pasi mposhti Manchester City me rezultatin 3-0. Sfida e parë e fazës së 1/8-ave në “Bernabeu” nuk kishte histori. Protagonisti absolut ishte Federico Valverde, i cili realizoi tripletën që vendosi fatin e takimit.

Mesfushori uruguaian shënoi në minutat 20, 27 dhe 42 duke i dhënë epërsi të qartë skuadrës së Arbeloa-s. Në pjesën e dytë, portieri Gianluigi Donnarumma priti penalltinë e Vinicius në të 58-ën, ndërsa Manchester City do të tentojë përmbysjen e madhe më 17 mars, në ndeshjen e kthimit në “Etihad”.

Paris Saint-Germain gjithashtu është shumë pranë kualifikimit në çerekfinale, pas fitores spektakolare 5-2 ndaj Chelsea. Francezët kaluan dy herë në avantazh me Barcola dhe Dembélé, por londinezët barazuan fillimisht me Malo Gusto dhe më pas me Enzo Fernandez. Lëvizja fituese për parizienët ishte aktivizimi nga stoli i Kvaratskhelia. Ylli gjeorgjian ishte protagonist absolut në çerekorëshin e fundit të ndeshjes me dy gola dhe një asist, duke vulosur fitoren 5-2 të PSG.

Ndërkohë, surpriza më e madhe e këtij edicioni mbetet Bodo/Glimt. Skuadra norvegjeze vazhdon përrallën e saj në Champions League, duke mposhtur edhe Sportingun me rezultatin 3-0 në ndeshjen e parë. Pas eliminimit të Interit në fazën “play-off”, ata dominuan edhe portugezët me golat e Fet, Blomberg dhe Hogh. Tani norvegjezëve u mjafton të rezistojnë në ndeshjen e kthimit në Lisbonë, për të arritur një kualifikim historik.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)