Tronditet Parisi, 48 vjet pritje për një fitore në derbi

Surpriza më e madhe e futbollit ndërkombëtar erdhi nga Kupa e Francës. Paris Saint Germain u eliminua në turin e 1/16, pasi u mposht me rezultatin 1-0 në derbin e kryeqytetit nga rivalët më të vegjël të Paris FC.

Skuadra që kërkon shërbimet e mesfushorit shqiptar Kristjan Asllani regjistroi fitore historike. Triumfi u regjistrua pikërisht në fushën e kampionëve në fuqi të kompeticionit, në “Parc des Princes”.

Vendimtar ishte goli i Jonathan Ikoné. Ish-lojtari i Fiorentinës dhe Comos, u aktivizua nga stoli në minutën e 40-të pas dëmtimit të Gory. Ai realizoi rrjetën e fitores në të 74-ën, pasi finalizoi një kundërsulm të shpejtë të skuadrës mike.

Pas Tripletës së sezonit të kaluar, Paris Saint Germain humbet zyrtarisht shansin që të përsëritë këtë arritje. Në anën tjetër, Paris FC priti 48 vjet që të luante derbin me rivalët e qytetit dhe kjo ndodhi dy herë brenda javës.

Pas humbjes 2-1 në kampionët, skuadra më e vogël e kryeqytetit francez realizoi një triumf madhështor, duke tronditur futbollin. Kjo ishte edhe fitorja e tyre e parë në ndeshje zyrtare kundër milionerëve të PSG.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)