I abonuar me golin, Trabzonspor po mendon të blejë Muçin

Ernest Muçi po kalon një periudhë gjithnjë e më pozitive te Trabzonspor, duke dhënë sinjale të qarta se është në rrugën e duhur për t’u afirmuar në Superligën turke.

Sulmuesi i Kombëtares shqiptare ka qenë pjesë e 12 ndeshjeve me skuadrën nga Trabzoni, teksa është aktivizuar në 6 prej tyre, duke fituar gradualisht besimin e stafit teknik dhe duke u përshtatur me kërkesat e kampionatit.

Paraqitjet e tij kanë tërhequr vëmendjen jo vetëm të tifozëve, por edhe të drejtuesve të klubit.

Sipas raportimeve të mediave turke, Trabzonspor po e shqyrton seriozisht mundësinë për të blerë kartonin e Muçit në mënyrë përfundimtare nga Beshiktash, klub që zotëron të drejtat e lojtarit.

Mediumi i njohur turk “Skorer” shkruan se drejtuesit e Trabzonsporit janë të kënaqur me potencialin dhe kontributin e shqiptarit, duke e parë atë si një investim afatgjatë për repartin ofensiv. Megjithatë, gjithçka do të varet nga vendimi për të ushtruar opsionin e blerjes, i cili sipas kontratës arrin vlerën e 8.5 milionë eurove.

Një tjetër element i rëndësishëm është afati kohor: opsioni për blerjen e kartonit të Ernest Muçit skadon më 31 maj. Kjo do të thotë se Trabzonspor ka ende pak kohë për të vlerësuar situatën dhe për të marrë një vendim përfundimtar, bazuar në performancën e lojtarit deri në fund të sezonit.

Nëse ky transferim konkretizohet, do të ishte një hap i madh në karrierën e Muçit, i cili synon të konsolidohet në elitën e futbollit turk dhe të rrisë më tej rolin e tij edhe në Kombëtaren shqiptare.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)