Hap fals i Milan, gjen të riun Bartesaghi, por jo 3 pikët

AC Milan vazhdoi serinë pozitive në Serie A, por u detyrua të kënaqet me një barazim 2-2 ndaj Sassuolos në San Siro, në një ndeshje ku Rossonerët humbën një mundësi të artë për të forcuar pozitat në krye të renditjes. Kjo ishte ndeshja e 14-të radhazi pa humbje për Milanin, megjithatë rezultati u konsiderua zhgënjyes duke pasur parasysh rrethanat.

Ndeshja nisi me Milanin më kërkues, por ishte Sassuolo që gjeti golin e avantazhit pas rreth 15 minutash lojë. Pas një aksioni të ndërtuar mirë, Ismaël Koné u tregua i saktë, duke realizuar me qetësi mbi portierin Mike Maignan. Goli i miqve e vuri në vështirësi Milanin, i cili pati vështirësi të çante mbrojtjen kompakte të Sassuolos në pjesën e parë.

Përpjekjet e vendasve u shpërblyen pak para pushimit, kur Davide Bartesaghi përfitoi nga një krosim i Ruben Loftus-Cheek dhe realizoi golin e barazimit, duke shënuar golin e tij të parë në Serie A. Ky gol i dha besim Milanit për pjesën e dytë.

Pas rifillimit, skuadra e Massimiliano Allegrit e mori kontrollin e lojës dhe përmbysi rezultatin sërish me Bartesaghin, i cili shënoi golin e dytë personal dhe të Milanit. Rossonerët patën edhe dy gola të anuluar më pas, një për faull dhe një për pozicion jashtë loje, duke humbur mundësinë për ta mbyllur ndeshjen.

Sassuolo nuk u dorëzua dhe, me kalimin e minutave, rriti presionin. Përpjekjet e tyre u shpërblyen rreth 15 minuta nga fundi, kur Armand Laurienté barazoi rezultatin në 2-2. Në minutat e fundit, të dyja skuadrat kërkuan golin e fitores, me Sassuolon që iu afrua më shumë, por pa sukses.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)