Incident i rëndë në burgun e Reçit, përplasen fizikisht dy të dënuarit e rrezikshëm

Një incident i dhunshëm është shënuar sërish në burgun e Reçit, në Malësinë e Madhe, ku dy të dënuar janë përfshirë në një konflikt fizik me pasoja të rënda.

Sipas burimeve, gjatë orarit të drekës Astmer Bilali dhe Mikel Thani janë konfliktuar me njëri-tjetrin në ambientet e institucionit penitenciar. Përplasja ka përshkallëzuar në dhunë fizike, ndërsa dyshohet se Mikel Thani është ndihmuar edhe nga disa të tjerë.

Si pasojë e përleshjes, të dy të burgosurit kanë pësuar dëmtime të konsiderueshme dhe janë transportuar me urgjencë drejt Spitalit të Burgut në Tiranë, ku po marrin trajtim mjekësor të specializuar.

Në vendngjarje kanë ndërhyrë menjëherë forcat e sigurisë së burgut, të cilat kanë neutralizuar situatën dhe kanë bërë ndarjen e personave të përfshirë në konflikt.

Mikel Thani ndodhet në vuajtje dënimi që prej vitit 2015, i dënuar për plagosjen e prindërve të ish-të fejuarës së tij dhe të mbesës së tyre. Ndërkohë, Astmer Bilali është arrestuar në kuadër të dosjes së njohur “Metamorfoza”.

Ky nuk është incidenti i parë në këtë institucion, pasi pak kohë më parë në burgun e Reçit u regjistrua një tjetër përplasje mes Safet Bajrit dhe Sokol Sanxhaktarit, ku ky i fundit mbeti i plagosur.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)