Grabitja e bujshme në Luvër, kurora e mbretëreshës Eugénie do të restaurohet

Kurora e mbretëreshës franceze Eugénie, e cila u ra hajdutëve gjatë grabitjes së bujshme në Muzeun e Luvrit, është thuajse e paprekur dhe do të restaurohet plotësisht. Lajmi u bë i ditur nga vetë muzeu i Parisit. Grabitja ndodhi në tetor të vitit 2025, me autorët që arritën të merrnin bizhuteri me vlerë rreth 88 milionë euro.

Por, gjatë arratisjes ata u detyruan të linin pas kurorën e paçmuar të mbretëreshës, të stolisur me diamante dhe smeralde. Ajo u gjet e shtypur dhe e dëmtuar. Sipas Luvrit, kurora ishte “e deformuar rëndë”, por mbeti “pothuajse e paprekur” dhe mund të rikthehet në gjendjen e saj origjinale pa pasur nevojë për rindërtim. Dëmtimi dyshohet se ka ndodhur në momentin kur grabitësit tentuan ta nxirrnin përmes një hapjeje të ngushtë që kishin sharruar në vitrinën prej xhami ku ajo ekspozohej.

Muzeu bëri me dije se kurora ruan të gjithë elementët e saj, me përjashtim të njërës prej tetë shqiponjave të arta që e zbukurojnë. Ajo i ka ende të 56 smeraldet dhe mungojnë vetëm 10 nga gjithsej 1,354 diamantet origjinale. Autoritetet kanë arrestuar katër persona të dyshuar si pjesë e grupit të grabitësve, por ende nuk është identifikuar organizatori kryesor i vjedhjes dhe as nuk janë gjetur bizhuteritë e tjera.

Foto nga web

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)