1 mln euro për kamion, kush është ‘Putin’ që mbushi Greqinë me cigare kontrabandë?

‘FBI-ja’ greke ka shkatërruar një rrjet të gjerë kontrabandistësh që fusnin në vend cigare pa pulla, me fitime marramendëse, të cilat sipas mediave helene përllogariteshin në gati 1 milion euro për kamion.

Operacioni kundër kontrabandës së cigareve u shtri në katër zona të Greqisë. Sipas dosjes hetimore rezulton se çdo kamion i përdorur nga rrjeti transportonte 33 paleta, që korrespondonin me një total prej 400,000 pako cigaresh të kontrabanduara, me fitim neto prej 2.5 eurosh nga secila pako, që do të thotë se çdo kamion nxirrte 1 milion euro të ardhura për grupin.

Gjatë operacionit u arrestuan gjithsej 25 persona, 19 në Atikë dhe gjashtë në Beoti. Organizata kishte ngritur një industri, pasi zotëronin pajisjet e nevojshme për prodhimin dhe ruajtjen e cigareve kontrabandë. "Njësia qendrore e operacionit ndodhej në Beoti, ndërsa rrjeti kishte të paktën dhjetë depo, kryesisht në zonat e Magnezisë, Atikës dhe Katerinit”, thuhet nga policia greke.

Rrjeti vepronte me një mekanizëm të ngjashëm me një “organizatë terroriste”. Anëtarët e  nuk e njihnin njëri-tjetrin, ndërsa në shumë raste vepronin si lidhje plotësisht të izoluara, duke zbatuar urdhra specifikë pa pasur një pasqyrë të përgjithshme të të gjithë aktivitetit të paligjshëm.

Me këtë metodë veprimi, edhe nëse një anëtar arrestohej, ai nuk do të ishte në gjendje të zbulonte pjesën tjetër të organizatës, pasi nuk ishte në dijeni të identitetit dhe rolit të të tjerëve.

Udhëheqësi i organizatës kriminale ishte një emigrant nga Kazakistani, të cilin të gjithë e quanin "Putin", referencë për Presidentin rus Vladimir Putin, gjë që tregon se sa pushtet të madh kishte.

"Putin" kishte arritur të krijonte një rrjet jashtëzakonisht të strukturuar, i cili vepronte si një makinë e akorduar mirë, me një qendër operacionesh që monitoronte të gjithë zinxhirin e prodhimit 24 orë në ditë.

Vëllai i tij, i cili njihej si "Presidenti", kishte zhvilluar një aktivitet legjitim në transportin detar dhe konkretisht në transportin e naftës. Të dy ishin kokat e kontrabandistëve të cigareve dhe komunikonin vetëm me dy nga vartësit e tyre dhe me askënd tjetër, me qëllim minimizimin e mundësisë së lidhjes me trafikimin e cigareve të kontrabanduara.

Ata kishin arritur të krijonin dhjetëra kompani fiktive, të cilat ishin të lidhura me njëra-tjetrën dhe kishin të njëjtin qëllim, të mbulonin gjurmët e tyre dhe të siguroheshin që të kalonin nën radarin e autoriteteve.

FBI greke ka arritur të zbulojë se paratë pastroheshin përmes blerjes së pasurive të paluajtshme. Të paktën shtatë prona në të gjithë Greqinë, anëtarët kryesorë i kishin blerë së fundmi. Vila me pishina dhe shtëpi të veçuara në periferitë jugore dhe veriore të Athinës dhe Selanikut, ndërsa "Putin" dhe "Presidenti" kishin gjithashtu një dobësi për ishujt, ku ata blenë prona. Të gjitha këto ia kishin transferuar të afërmve të ngushtë, në mënyrë që asgjë të mos shfaqej në emrat e tyre.

Në të njëjtën kohë, po kontrollohen nga autoritetet helene më shumë se 400 llogari bankare, përfshirë ato në Emiratet e Bashkuara Arabe, dhe pritet që asetet të ngrihen.

Një oficer policie është midis 13 të akuzuarve, pasi është vërtetuar se ai fshinte targat e automjeteve që i ishin dhënë nga anëtarët e organizatës kriminale. Vetëm në nëntor është vërtetuar se ai kreu 30 kontrolle, ndërsa merrte 500 euro në muaj për shërbimet e tij.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)