“Thesar” me verë, 800 shishe nxirren nga fundi i detit, cilësia është mahnitëse

Një eksperiment i pazakontë në Argjentinë ka dhënë rezultate mbresëlënëse. Plot 800 shishe verë u nxorën nga fundi i detit, ku kishin qëndruar për gjashtë muaj, në Gjirin San Matías, përballë zonës turistike Las Grutas. Projekti u realizua me pjesëmarrjen e rreth 20 kantinave nga provinca Río Negro, në kuadër të Programit të Bodrumit Nëndetar, të mbështetur nga autoritetet lokale.

Qëllimi i këtij eksperimenti ishte të analizohej ndikimi i mjedisit detar në procesin e vjetërsimit të verës. Lëvizja e vazhdueshme e ujit, temperatura e qëndrueshme dhe drita e filtruar nën sipërfaqe krijojnë kushte unike, që sipas specialistëve, mund të ndikojnë drejtpërdrejt në cilësinë përfundimtare të produktit.

Pas nxjerrjes, verërat iu nënshtruan degustimit, ku u krahasuan me shishe të së njëjtës serie, të ruajtura në bodrume tradicionale në tokë. Rezultatet treguan dallime të qarta, veçanërisht tek verërat e reja, të cilat shfaqën ndryshime të ndjeshme në aromë dhe shije.

Përveç vlerës shkencore dhe enologjike, projekti pritet të rrisë edhe atraksionin turistik të rajonit, pasi një pjesë e shisheve do të prezantohet në Festivalin Punto Río Negro.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)