Pushime falas në vilë me pamje nga deti në ishullin grek, ka vetëm një kusht

Dashamirët e kafshëve kanë tani një alternativë unike ndaj pushimeve tradicionale. Në ishullin grek të Syrosit, organizatat për mirëqenien e kafshëve po ofrojnë akomodim, shërbime dhe mëngjes falas për vullnetarët që ndihmojnë në kujdesin e popullatës së madhe të maceve endacake, raporton Time Out.

Programi menaxhohet nga organizata “Syros Cats” dhe kërkon angazhimin e vullnetarëve për një periudhë prej të paktën dy deri në gjashtë javë, me minimum një muaj. Në këmbim, pjesëmarrësit përfitojnë strehim, shpesh me pamje nga deti, si dhe shërbime bazë falas.

Sipas organizatorëve, vullnetarët angazhohen rreth pesë orë në ditë, pesë ditë në javë, duke ushqyer, pastruar, monitoruar shëndetin dhe duke ofruar kujdes mjekësor për macet. Misioni i organizatës është menaxhimi human i rreth 3.000 maceve endacake në ishull përmes programit TNR (kapje, sterilizim dhe rikthim), si dhe ofrimi i ndihmës veterinare kur është e nevojshme.

Sipas TravelPirates dhe vetë “Syros Cats”, puna është fizikisht e lodhshme, por jashtëzakonisht shpërblyese, duke e bërë këtë përvojë ideale për njerëz të përgjegjshëm, në formë të mirë fizike dhe të aftë të punojnë në mënyrë të pavarur.

Foto: Instagram

Organizata, e cila vepron që nga vitet 1990 dhe konsiderohet pioniere e lëvizjes për mirëqenien e kafshëve në Syros, po kërkon individë të shëndetshëm dhe të përkushtuar. Detyrat përfshijnë gjithashtu socializimin e koteleve të shpëtuara, për t’i përgatitur ato për adoptim në shtëpi të reja.

Ndikimi i këtyre përpjekjeve shkon përtej kujdesit për kafshët. Falë punës së “Syros Cats” dhe “God’s Little People Cat Rescue”, marrëdhënia mes banorëve vendas dhe maceve ka ndryshuar rrënjësisht, duke u kthyer nga armiqësi në respekt të ndërsjellë, ndaj sot, macet konsiderohen një simbol krenarie për ishullin.

“Ne duam t’i tregojmë botës se kafshët kanë rëndësi”, ka deklaruar Richard Bowell, bashkëthemelues i “God’s Little People Cat Rescue”, për Greek Reporter.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)