Porti kyç i Rusisë në Detin e Zi në flakë pas sulmit ukrainas

Një sulm i ri me dronë ka goditur portin strategjik rus të Tuapse në Detin e Zi, duke shkaktuar viktima dhe dëme të konsiderueshme në infrastrukturën energjetike.

Sipas raportimeve, të paktën një person ka humbur jetën dhe një tjetër është plagosur, ndërsa në terminalin e madh të naftës shpërthyen disa vatra zjarri. Ky është sulmi i dytë ndaj të njëjtit objekt brenda më pak se një jave.

Objektivi kryesor besohet të ketë qenë rafineria në pronësi të kompanisë “Rosneft”, e cila ende po rikuperohej nga dëmet e një sulmi të mëparshëm. Pamjet që qarkullojnë në rrjetet sociale tregojnë depo të naftës të përfshira nga flakët, ndërsa autoritetet lokale raportojnë dëmtime edhe në një gazsjellës, një kishë dhe dy shkolla.

Kryebashkiaku i qytetit, Sergej Bojko, deklaroi se shërbimet emergjente janë në terren, ndërsa imazhet satelitore tregojnë një re të dendur tymi që përhapet në distanca të mëdha.

Rafineria e Tuapses, me kapacitet rreth 12 milionë tonë në vit, konsiderohet një nyje kyçe për eksportin e produkteve të naftës ruse. Ndërkohë, Ministria ruse e Mbrojtjes njoftoi se gjatë natës janë rrëzuar 112 dronë ukrainas.

Sulmet vijnë në një kohë kur Ukraina ka intensifikuar goditjet ndaj infrastrukturës energjetike ruse, me synim dobësimin e të ardhurave nga nafta.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)