"Magjia" që ndodhte në Kinë, si u ndërtua stacioni i trenit për 9 orë

Shpesh dëgjojmë për projekte infrastrukturore që zgjasin me vite të tëra deri në finalizimin e tyre. Krejt e kundërta ndodhte vite më parë në Kinë, aty ku përfundoi rindërtimin dhe lidhjen e një stacioni hekurudhor brenda vetëm nëntë orësh, duke dëshmuar edhe një herë fuqinë e organizimit dhe planifikimit në projektet e mëdha infrastrukturore. Operacioni u zhvillua në stacionin Nanlong, në qytetin Longyan, në jug të vendit.

Punimet nisën në orët e pasdites dhe përfunduan para agimit. Në terren u angazhuan rreth 1.500 punëtorë, të mbështetur nga shtatë trena transporti dhe 23 ekskavatorë, të cilët vepruan sipas një plani të detajuar minutë pas minute. Qindra punonjës u koordinuan njëkohësisht, ndërsa e gjithë ndërhyrja u monitorua edhe nga dronë.

Qëllimi i projektit ishte lidhja e linjave hekurudhore Ganlong, Ganruilong dhe Zhanglong me linjën e re Nanlong. Procesi u nda në faza të qarta, një pjesë e ekipeve merreshin me shtrimin dhe betonimin e terrenit, ndërsa të tjerë instalonin sistemet e sinjalizimit, kontrollit dhe monitorimit.

Sipas autoriteteve lokale, kjo metodë e punës bëri të mundur që brenda një nate të realizoheshin procese që zakonisht kërkojnë muaj. Linja e re është pjesë e një rrjeti hekurudhor prej mbi 246 kilometrash dhe është e projektuar për trena që arrijnë shpejtësi deri në 200 km/h, duke shkurtuar ndjeshëm kohën e udhëtimit dhe duke përmirësuar transportin e pasagjerëve dhe mallrave në një zonë strategjike të Kinës.

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)