“Gjuha shqipe, e drejta jonë”, studentët protestojnë në Shkup

Qindra studentë shqiptarë kanë dalë sot në rrugët e Shkupit, duke rikthyer në vëmendje një debat të hershëm, të drejtën për të përdorur gjuhën shqipe në provimet e Jurisprudencës. Një e drejtë që sipas tyre është e garantuar në ligj, por që në praktikë mbetet e pazbatuar.

Me pankarta në duar dhe thirrje si “Ne flasim shqip”, “Gjuha shqipe, e drejta jonë” dhe “Nuk ka shtet pa rini”, studentët kërkuan që provimi i Jurisprudencës, një hap kyç për ushtrimin e profesioneve si avokat, gjyqtar apo prokuror, të zhvillohet edhe në gjuhën shqipe. Aktualisht, ky provim zhvillohet kryesisht në gjuhën maqedonase, pavarësisht statusit zyrtar që gjuha shqipe ka në Maqedoninë e Veriut.

Protestës i është bashkëngjitur edhe një peticion i firmosur nga studentët, ndërsa qëndrimet politike kanë qenë të ndara. Kryeministri Hristijan Mickoski fillimisht e cilësoi kërkesën si të drejtë, por më pas u tërhoq, duke deklaruar se ligji nuk e lejon një gjë të tillë. Nga ana tjetër, Ministria e Drejtësisë e ka zhvendosur debatin në aspektin teknik, duke argumentuar se bëhet fjalë për një provim profesional dhe jo një procedurë administrative.

Çështja ka ndezur edhe përplasjet politike. Nënkryetari i BDI-së, Bujar Osmani, akuzon VMRO-DPMNE për një strategji të qëllimshme kundër përdorimit të shqipes në institucione, ndërsa Izet Mexhiti nga koalicioni VLEN thekson se boshllëqet ligjore po prodhojnë zgjidhje të pjesshme.

Në mbështetje të studentëve ka reaguar edhe ministri i Jashtëm i Shqipërisë, Ferit Hoxha, i cili e cilëson përdorimin e gjuhës amtare si një të drejtë themelore që nuk mund të kufizohet nga procedurat. Ai bëri thirrje për shmangie të politizimit dhe zgjidhje përmes dialogut konstruktiv.

Mbështetje ka ardhur edhe nga Elisa Spiropali, e cila thekson se “gjuha shqipe nuk është çështje diskutimi, por një e drejtë themelore”, duke shtuar se kur të drejtat kërkohen në rrugë, kjo tregon se diçka nuk funksionon në praktikë.

Lexo më shumë

RAJON

Spiropali mbështet protestën e studentëve shqiptarë në Maqedoni: Gjuha shqipe e drejtë themelore!

Në një reagim në Facebook, Spiropali shpreh mbështetjen për studentët, duke e cilësuar protestën e tyre si një sinjal se disa të drejta themelore nuk po zbatohen siç duhet në fqinjin tonë lindor.

12:00 6 ditë më parë06.04.2026.

Autori

Shkarkoni aplikacionin Newsmax Balkans:

Mund ta shkarkoni aplikacionin Newsmax Balkans nga Google Play dhe App Store.

Komente (0)